"OPA, BOBY MAU KINCING", by: Nella Lanite Delvia

 

Nella Lanite Delvia

Satu kali, Opa ada tarima tamu di Baranda muka. Ini ana Yakobus ni seng kuat tahang Kincing lai. Dia datang for Opa, di muka tamu dia bilang "Opa, Boby mau kincing..". Opa seng pastiu, carita jalan trus. Dia bilang tambah basar, "OPA, BOBY MAU KINCING". Opa su sadiki marah lai, Opa bilang, "Heh... kalo mau kincing, kincing di kamar mandi sana. Opa ada deng tamu". Boby pigi lapas di kamar mandi. Pas tamu pulang Opa panggel Boby, Opa bilang, "Yakobis, laeng kali kalo mau kincing, jang bilang kincing di muka orang tatua. Itu seng tahu malu, nanti Opa pung tamu bilang apa...?" Boby tanya, "Lalu beta musti bilang apa Opa?". Opa jawab, "Pokoknya bilang apa ka, asal jang bilang mau kincing. Bagini saja, kalo mau kincing, se bilang - Opa, Boby mau manyanyi - itu Opa su tahu sudah".
Akang pung tengah malam, Boby tidor deng Opa di kamar blakang. Boby su mati kincing tapi taku kaluar sandiri. Boby kasbangong Opa, "Opa...Opa... Boby mau manyanyi...". Opa kaget bangong deng marah-marah.. "Manyanyi apalai Yakobis deng orang pung tengah malam ni..?". Boby seng mau tau, Boby tetap bilang, "Seng bisa Opa, Boby seng kuat tahang lai, Boby mau manyanyi niiii.....?". Opa seng bisa tahang, Opa angka jua, "Io sudah, daripada ose pung orang tatua deng tetangga bangong gara-gara se manyanyi, mari la manyanyi palang-palang di Opa pung talinga ni saja", Opa sorong talinga ke arah Boby. Seng hitung satu dua tiga, Boby lucu calana, kasluar mic kacil tu, deng Boby manyanyi palang-palang di Opa pung talinga jua.... Mamaeeee.... Opa Babasa...

Like · · Follow Post · 8 hours ago

catatan: Cerita ini mengandung kelucuan yang alami, tapi sudah diposting berulang kali di CLAM